سفر اﻷيام | الثلاثاء

الصبح الساعات بتسيح 

 

زي معلقة زبدة في طاجن فول

 

صوت زار جاي من بعيد

 

من ييجي ٧ عشرات من السنين

 

جدتي حمدة ماسكة الطنبورة

 

وأبويا فزعان من الكودية بيخرف

 

بيقول لستي "الحقيها دي تحت السرير هتخطفني"

 

ريحة خشب بيت جدتي التانية

 

وخطوط خيوط الضو نازلة على القدرة

 

لما بعتتني الصبح أجيب البليلة

 

من بعد تلاتين سنة

 

بيت الحسين راح وانهد 

 

جامع الست النبوية حواليه زحام

 

ما عرفتش فين طاهروني لما رحت وزرت

 

كبرت وشاب قلبي وهو شاب 

 

راحت مني ريحة  الضريح 

 

وريحة السمك البسارية

 

في الصبح الساعات بتسيح

 

وأنفاس أبويا هي الشيء الوحيد  

 

اللي بيقول إني لسة حي.

سفر اﻷيام | الاتنين

اﻻتنين دا كل اﻷحبة

 

عمري ما حانساه وﻻ أنا فاكره.

 

شريط أمير قديم بغلاف أصفر

 

جنب ديوان شعر من غير غلاف

 

والراديو طالع منه شمس اﻷصيل

 

طلع عليا النهار

 

والشمس ذَهَبت خصاص قلبي وشعر راسي

 

هايم عن الوجدان

 

من غير حبيب أناجيه 

 

أنا واللي أحبه يا نيل

 

ما نشبه لحد

 

هو مش موجود 

 

وأنا في المحبة فرد

 

كل اتنين بافتكره

 

أناجيه وهو غايب 

 

"تجلى على قلبي وقول لي 

 

إنت ربي في عُلاك وﻻ إنت على دي اﻷرض"

سفر اﻷيام | اﻷحد

اسمه دا من الوحدة وﻻ عشان ما كان له حد.

 

في عصاريه تسكت الدنيا والطير يناجي الصمد.

 

صاجات عرقسوس من بعيد

 

تختلط مع عصافير العجوزة

 

تقطع سكون الصمت.

 

ندهة تايهة على شط النيل

 

ميكروباص معدي 

 

صاجه يغلي فوقه زيت قنديل.

 

عودي على ضهري

 

لو اتهز صدري بتنهيدة

 

يرن وتره جوا شنطته الخضرا.

 

يا رنة الوتر

 

يا صمت الشجر

 

يا رعشة صوت الطير وهو بيناجي

 

خلي ليا حد أشرب معاه ساعة عصاري

 

كوبايتين شاي وﻻ حتى نص فنجان قهوة

 

وﻻ تسيبنيش مصلوب في وحدتي 

 

وابعث قلبي بقيامة زي المسيح في ليلة اﻷحد.

 

 

سفر اﻷيام | السبت

السبت ثبت في المكان

قالوا في الكتاب دا يوم الراحة

مش يوم العمل

في شرفة الروح وقفت ودلدلت السبت.

نهاية اﻷسبوع اللي فات

وﻻ بداية اللي جاي

ما بقيتش عارف اﻷيام

وتايه في حيرة العدد.

ساعة العصاري أزرقت السما

ثم أصفرت بشمس حارقة

قبل الغروب خنقتها العوادم وبدأت تغمق.

إنت اللي كان

وﻻ اللي جاي؟

إنت المجدلية وﻻ البتول؟

وﻻ إنت يحيى الحصور وسالومي بكرة تنهي رحلتك.

قبل الاكتمال

قبل الاكتمال

الستة وتلاتين

سنك قبل الاكتمال بنقطة.

اجمع الستة والتلاتة تلاقي تسعة

فاضل لها واحد وتدخل خانة العشرات.

والستة للتلاتين خُمس

خمس خمسات رقوك زمان مع الحلبة والمغات.

كلهم تلاتة وتلاتين سنة و تلاتة

تلت قرن وزايد عليه تلت عشر.

تلت عشته بطولها وعرضها

وتلت عشته انحشر جوا القلب حشر.

تلات سنين اﻷولة موت والتانية فوت

والتالتة عدت أيامها بمشرط على ضهرك.

قبل الاكتمال نقطت روحك جواك نقط نقط

والقلب نور بنور غريب قام من مكانه اتنفض.

هي الحقيقة سراب وﻻ عنبر من فم الحبيب بيسرسب

الكلمتين أصلهم من سرب

والسرب طير جواه سر انشرب.

 

*التنسيق باستخدام الخط اﻷميري.

البحر

حائط هو البحر/ أسمع النوارس تبكي/ إنها تلوح لنا- توماس ترانسترومر

ذلك البحر الذي يحمل ملحًا ورائحة يود عفنة، ربما هي مرارته، وربما هرموناته الذكورية، ينادي بها الصبايا، لتخلعن ما تبقى من لحمهن ويلقين بأنفسهن من فوق الزبد، إلى اليم العميق.

ما بداخل البحر، تلك الزرقة الرمادية، التي تغمره ويغمر بها العالم قبل بزوغ الشمس وبعد الغروب.

هو البحر، مرفأ أخير وهلاك أخير، فرار من الطوفان، وطوفان في الوقت نفسه.

هو البحر يا سيد، كنت تقف كثيرًا على شاطئه وتلوح للشمال حينًا، وللشرق حينًا، وتغني زوروني، زوروني كل سنة مرة، لكن السنوات لم تأتِ ولو لمرة.

هو ذلك البحر الممتد المسافر للبعيد، أهو الإله، أم مخلوق آخر من مخلوقات ذلك الرب المُحير، كل تلك الحيرة بداخل البحر.

كل تلك الأسئلة، ربما لولا أسئلته وحيرته الكبيرة
ربما لما كانت اليابسة.

قفر وخالِ ذلك البحر- ت.س.إليوت

وقبل أن يرى البحر، يحس المسافر بسرعة تدفق في الدم - خ.ل.بورخس

هو البحر، وريح الشتاء تعصف بسطحه، تروح، تروح ولا تعود.

هو ذلك البحر، العاشق الأبدي

المفارق الأبدي

يلثم صخوره في لحظة

ليفارقها في اللحظة التالية.

هو البحر

تشرق عنده الشمس

لتغيب.

أكتوبر ٢٠١٠ 

*التنسيق باستخدام الخط اﻷميري

عن كرة القدم والتقاسيم

عن كرة القدم والتقاسيم

باحب كرة القدم لأني باحب الموسيقا القائمة على الارتجال، كرة القدم بالنسبة لي هي التقاسيم في الموسيقا المقامية، حتى كلمة تقسيمة مشتركة بين كرة القدم والطرب.

اللي بيقسم عليك في اللعب -اللعب كمان كلمة مشتركة- بيبقى عاوز يجيب فيك إجوان، مرة عمار الشريعي وصف فريد الأطرش بإنه لازم يجيب إجوان في كل جملة بيقسمها، كرة القدم نص مفتوح زي التقساسيم الحرة، لها إيقاع ساعات بيهدا وساعات بيهبط وساعات بيهجم عليك الخصم زي هجوم الصمت على ريشة عازف العود لغاية ما ترتبك وتقول للفريق "اصحوا ليغفلونا" بصوت كابتن لطيف أو تقول للعازف "إيه يا عم حاسب هتقع".

كرة القدم فيها مكسب وخسارة والارتجال الموسيقي كمان ممكن يكسب جون في المستمع وممكن يخسر، التقاسيم بتبقى على مقام واحد في الغالب، كرة القدم كمان بتبقى على طريقة لعب واحدة، بس زي ما المقام بيتلون، وبتقعد في كل نقلة في الملعب وفي كل ضربة ريشة أو رعشة وتر وصمت تفكر هيروح فين، هيفتح الوينجين ولا يقفلهم، هيحول ال4-4-2 ل4-3-3 ولا يرجع يدافع هيحول الراست سوزناك ولا ماهور ولا يرجع للراست المرصع بتاع زمان اللي عامل زي تراقيص مارادونا سنة 86، كمتلقي بتقعد عشان تستنى المفاجأة دي إما تقول لها "الله الله يا لعيب" وإما تقول للي لعبها "اتفو ع اللي دربك"

ماتش الليلة دي بين الزمالك وصن داونز عامل زي تقسيمة عود، مطلوب منك أربع مراحل، استهلال تعرض فيه أول المقام ومظهره والتانية تعرض فرعه والتالتة تعرض تلاوينه والرابعة تقفل وآه من القفلة، القفلة الحلوة زي الجون الرابع بتاع الزمالك لو النتيجة 3-0 وييجي في الدقيقة 91، ساعتها تتكيف، المباراة زي التقاسيم لغز، هيجيب الأول إمتى والتاني إمتى طيب لو ما وزعش المجهود طب لو جابهم بدري -لا مؤاخذة في اللفظ يعني- وريح مش هيكيف الجماهير.

كرة القدم اللي بالطريقة دي هي اللي تكيف، هي اللي تبقى زي جملة موسيقية الست تعمل فيها وحايد ألف مرة، كرة القدم اللي ما تعرفش إيه اللي جاي فيها هي "يا قلبي آه" في هو صحيح الهوى غلاب.

في لعبة زي دي مش مهم الربح ولا الخسارة، لما تدوق حلاوة المفاجأة وجمل القفلة ومزيكتها، تهتف وتقول دي مش كورة دي مزيكا و
 #سنظل_أوفياء

التنسيق باستخدام الخط الأميري.