بلاها حب

بلاها حب
كل أملي ألاقيكي وتلاقيني
بدال ما أسهر ليلي
من غير جليس أكلمه
بدال ما أمشي خايف
من دقة كعابي على اﻷسفلت
وصداها في الفضا
ألاقي جنبي خطوك الخافت
يمشي يونسه
من غير مشاعر مضافة
بكلام كبير يزيف اللي فيها
من غير ورود أو عهود أو عقود
أو حتى لمسة زايدة عن حدها
كل اللي عاوزه منك شوية ونس
تحرسي مكاني لما أغيب
تقعدي قدامي لما أشرب قهوتي
أتأمل شعاع شمس الغروب على وشك
وانتي ساكتة وأنا باسمع سكاتك
بلاها حب كل اللي حوالينا سجنوا الحاجات
جوا القيود
لو سمينا ما بيننا راح يضيع ضمن الحدود
خلينا نلاقي بعضنا
نتونس بالصمت اللي بيننا
من غير كلام